Málborg var stofnuð af Svanhildi Kr. Sverrisdóttur snemma árs 2013, sem útgáfu- og ráðgjafarfyrirtæki. Fyrsta verkefni Málborgar var útgáfa Málfinns. Málfinnur hafði komið út tólf árum áður hjá Námsgagnastofnun og átt farsælan feril innan skólakerfisins. Kominn var tími á endurskoðun og var Málfinnur aukinn og endurbættur og bókin fékk nýtt og fallegt útlit. Á eftir Málfinni komu úr smáforritin Snjallfinnur og Ísborg. Samhliða gerð námsefnis og útgáfu veitir Málborg aðstoð við textagerð og ráðgjöf á sviði kennslu- og menntamála.  

Svanhildur Kr. Sverrisdóttir hefur lokið B.Ed.-prófi í list- og verkgreinum, BA-prófi í íslensku, M.Ed.-prófi í uppeldis- og kennslufræðum með áherslu á kennslufræði móðurmáls og doktorsnámi í menntunarfræðum. Svanhildur hefur langa reynslu af kennslu á öllum skólastigum, hún ritstýrði Skímu, málgagni móðurmálskennsla 2006–2011, starfaði sem kennsluráðgjafi í grunnskólum Garðabæjar og sem sérfræðingur í mennta- og menningarmálaráðuneytinu í mörg ár. Hún hefur veitt einstaklingum, kennarahópum, skólum og sveitarfélögum kennsluráðgjöf, m.a. um stefnumótun, símenntun kennara, kennsluhætti, þróunarverkefni, námsmat og læsi. Svanhildur hefur tekið þátt bæði í rannsóknum á skólastarfi og úttektum á vegum mennta- og menningarmálaráðuneytis, setið í samstarfshópum og nefndum þar sem fjallað er um málefni skólakerfisins og verið verkefnisstjóri ýmissa verkefna, nú síðast formaður starfshóps á vegum mennta- og menningarmálaráðuneytis um mótun framtíðarstefnu um samræmd könnunarpróf. Þá hefur Svanhildur verið fulltrúi mennta- og menningarmálaráðuneytis í Evrópusamstarfi um nám fullorðinna og landstengiliður í Evrópusamstarfi um fullorðins­fræðslu. Svanhildur hefur skrifað ýmsar greinar um kennslu og samið töluvert af námsefni, bæði bækur og rafrænt efni. Mest af því efni hefur Menntamálastofnun (áður Námsgagnastofnun) gefið út.